काठमाडौं– फिल्म ‘अञ्जिला’ को ट्रेलर सार्वजनिक गरिएको छ। फिल्म महिला राष्ट्रिय फुटबल टिमकी कप्तान तथा गोलरक्षक एञ्जिला तुम्बापो सुब्बाको संघर्षदेखि कप्तानसम्म सफलताको कथामा आधारित छ, जसमा प्रेम, संघर्ष,पारिवारिक उतारचढाव र सफलताको कथालाई प्रस्तुत गरिएको छ ।

सार्वजनिक ट्रेलरमा मुख्य पात्र अञ्जिलाको संघर्ष र उसको जीवनको विभिन्न उतार-चढावलाई देखाइएको छ । एञ्जिला आफैँ प्रमुख भूमिकामा छिन् भने अभिनेता दयाहाङ राई र अभिनेत्री सिर्जना सुब्बा उनका बुवाआमाको भूमिकामा देखिएका छन् । फुटबलको विपक्षमा बुवा र पक्षमा आमा छन् ।

एक खेलाडीको संघर्षको कथामा आधारित फिल्म यही २९ फागुनमा प्रदर्शन हुनेछ । फिल्मका निर्देशक मिलन चाम्स हुन् । फिल्ममा एञ्जिलासहित कलाकार सुनिल थापा, विजय बराल, माओत्से गुरुङ, बुद्धि तामाङलगायत छन् ।

फिल्मको निर्मातामा प्रेम कुमार श्रेष्ठ छन् । फिल्मको छायांकन एञ्जिलाको जन्मथलो इलामको आइतबारेसहित झापा, र काठमाडौंमा गरिएको छ । फिल्म सुदीप बरालले छायांकन र मिलन श्रेष्ठले सम्पादन गरेका हुन्।मुन लभ इन्टरटेन्मेन्टको ब्यानरमा निर्माण भएको फिल्मका निर्माता प्रेम कुमार श्रेष्ठ हुन् ।