काठमाडौं, फागुन २। सन् २००८ मा मुम्बईमा भएको आतंकवादी आक्रमणका एक अभियुक्तलाई भारतलाई सुपुर्दगी गर्न अमेरिका तयार भएको छ। अमेरिकी राष्ट्रपति डोनाल्ड ट्रम्पले भारतका प्रधानमन्त्री नरेन्द्र मोदीलाई ह्वाइट हाउसमा स्वागत गर्दै यो जानकारी दिएका हुन् ।

आक्रमणको एक अभियुक्त तहववुर राना हाल लस एन्जलसको जेलमा छन्। उनी पाकिस्तानी मूलका क्यानाडेली नागरिक हुन् र डेभिड कोलम्यान हेडलीका निकट साथी रहेका छन्। हेडली मुम्बई आक्रमणको मुख्य योजनाकार मानिन्छ।

ट्रम्पले पत्रकार सम्मेलनमा भने,‘अमेरिका एक हिंस्रक व्यक्तिलाई भारत फिर्ता पठाउँदैछ।’ मोदीले यस निर्णयको लागि ट्रम्पलाई धन्यवाद दिँदै भारतको अदालतले उचित निर्णय गर्ने विश्वास व्यक्त गरे।

भारतको विदेश मन्त्रालयले तहववुर रानालाई सुपुर्दगीका लागि अमेरिकी अधिकारीसँग पत्राचार गरेको थियो। रानाले आफ्ना सुपुर्दगीका विरुद्ध अमेरिकी अदालतमा अपिल गरेका थिए । तर, अमेरिकी सर्वोच्च अदालतले उनको अपिललाई २१ जनवरीमा खारेज गरेको थियो। अब, अमेरिकी राष्ट्रपति ट्रम्पले यो प्रक्रिया तत्काल शुरू हुने बताएका छन्।